Ursell Arends, President d ATSA, Aruba Timeshare Association, recientemente a duna un discurso na Universidad di Aruba dilanti un audiencia mixto di studiante y ehecutivonam di e industria, na e ocasion cu timeshare ta celebrando 40 aña na Aruba. Arends a splica cu su intencion tabata pa inspira e studiantenan di Universidad di Aruba y transmiti e mensahe cu e industria di Timeshare ta ofrece un oportunidad solido den hospitalidad.

E atardi aki na Universidad tabata pa comparti e resultado di un estudio cu a wordo realisa pa un grupo di studiante di e facultad di Hospitality and Tourism Managemt Studies. E studiantenen a traha diligentemente pa investiga y entrevista basta propietario di timeshare y bishitantenan y a documenta nan feedback encuanto nan patronchi di gasto y nan motibonan pa keda regresa Aruba.

E estudio tabata posibel danki na e apoyo di Jo-Anne Croes y e decano John Wardlaw di Universidad di Aruba, y profesor Robin B. DiPietro di Universidad di South Carolina, kende a duna di conoce e resultado di e estudio. Profesor DiPietro a analisa y compara e datonan recogi pa prepara un rapport y e resultadonan ta confirma di manera concluyente cu e componente di timeshare tin un impacto positivo significante riba e economia di Aruba.

ATSA ta consciente di su importancia y pa e motibo ey den 2017 e la encabesa e encuesta den colaboracion cu Universidad di Aruba y Aruba Tourism Authority. E obhetivo tabata pa determina exactamente kiko ta e impacto di timeshare riba e economia di e isla.

E Gerente Generalnan di Aruba Timeshare Association a colabora enormemente y a pidi tur nan miembronan y bishitantenan pa wordo entrevista pa e encuesta, dunando informacion valioso na e studiantenan di Universidad di Aruba pa acumula e datonan cu a forma e rapport aki.

Vacation Ownership, anteriormente conoci como e industria di timeshare, a celebra su di 40 aniversario riba e isla na 2017. Vacation Ownership na Aruba ta consisti di aproximadamente cuarenta (40) porciento di e inventario total di accomodacion di hotel, y den 2017 a celebra su di cuarenta (40) aña di existencia.

Danki na e propietarionan fiel, e ocupacion halto durante full e aña di e diesseis (16) timeshare hotel riba e isla ta e envidia di hopi competencia den Caribe, y ATSA ta kere cu mester hasi un estudio actualisa cada tres (3) aña pasobra cu patronchinan ta cambia y tendencia di e industria tambe ta cambia.

Durante 2017, cual tabata un aña sumamente positivo pa e asociacion, ATSA ta sigui bai padilanti door di implementa strategianan di nivel halto cu ta segura e posicion relevante, vibrante y sostenibel di ATSA den futuro, kedando e voz di Vacation Ownership Industry.

Expansion di Miembresia

Aña pasa e asociacion a cuminsa cu e proceso pa modifica su statutanan pa inclui condominiums cu ta wordo maneha pa Owner’s Association. Segun estableci pa ley, unabes cu un compleho bende mas cu 50%, Owner’s Association ta tuma e maneho over y e cambio den e statutanan di ATSA lo facilita e miembresia pa un cantidad di desaroyo exitoso di condominiums.

Proteccion di etica laboral

Den colaboracion cu e gran mayoria di su miembronan, ATSA ta comprometi na respalda e criterianan halto y e conducta etico den e industria di Vacation Ownership. Pa demonstra e compromiso aki, e asociacion a adopta un norma di etica formal.

Proyecto comunitario di ATSA

Riba Thanksgiving Day ATSA a compromete di apoya Cruz Cora Aruba. E organisacion di Cruz Cora a caba di celebra nan di 60 aniversario brindando asistencia humanitario na e comunidad local y nan reaccion y accion rapido na desaster pa alivia e sufrimento humano den comunidadnan vulnerabel, awo ta conta cu e respaldo total di ATSA.

Ademas, den zomer aña pasa ATSA a firma un compromiso di 5 aña cu futbol hubenil di e isla ora cu nan a bira e patronicador orguyoso di SV Britannia. ATSA ta reconoce e dedicacion di SV Britannia y su inversion den e hubentud. ATSA ta preparando pa yuda e club supera futuro desafionan.

Mas importante ta cu den 2018 ATSA lo crea un business case cu CEDE ARUBA pa “Individual Giving Based Fundraising”. Despues di un encuesta exploratorio online entre e miembronan a sali na cla cu un “Individual Giving Based Fundraising” ta posibel entre e miembronan di ATSA, y despues cu un ekipo chikito di profesionalnan a wordo poni den otro, mayoria di e miembronan a confirma nan compromiso di participa den maart 2018. Na lugar di habri e recaudacion di fondo pa aplicacion di diferente organisacion, ATSA y CEDE a colabora pa garantisa cu e fondonan ta bai unda cu realmente tin necesidad. Un area cu ta den consideracion ta e programa extra curricular pa mucha mayor di 12 aña. Otro areanan ta inclui cuido infantil di calidad y pagabel. ATSA y CEDE Aruba ta planea di desaroya un serie di programa hunto cu NGO’s relevante.

Retonan?

Arends a informa cu e industria di 40 aña mester keda reinventa continuamente pa continua cu exito durante por lo menos 40 aña mas. E generacion nobo di propietarionan ta diferente cu esunnan original, y nan necesidadnan mester wordo satisface cu productonan nobo y servicio nobo.

Recientemente durante e “Second Academic Economic Forum” cu a wordo teni na Universidad di Aruba, decano Wardlaw a revela cu un investigacion bao di e studiantenan universitario a confirma cu solamente 10% di nan ta dispuesto pa traha den turismo debi na e oranan largo incluyendo fin di siman y dianan di fiesta.

Arends a declara cu como e futuro di e industria, e kier comparti su storia personal cu e studiantenan di Universidad di Aruba. Den su propio palabranan, e la bisa cu e la involucra su mes cu ATSA ora cu e la scucha algun di e pioneronan di e industria ta papia di e necesidad pa busca mas hoben profesional pa join e asociacion y trece ideanan nobo. E tabata sigur cu nan tabata papiando cune e dia, 16 di januari 2016, na e celebracion di aña nobo di ATSA, caminda cu e tabata representando su doño di trabao, La Quinta Beach Resort.

E dia siguiente e la inscribi su mes y e la cuminsa reconoce e sacrificionan cu su rolemodels y pioneronan den e industria mester a soporta, y tur e esfuerso cu nan a hasi pa e industria ta asina vibrante manera cu e ta awendia, un base solido cu continuamente ta rekeri hobennan y ideanan nobo.

“Mi ta spera cu tur di boso cu ta a punto di hasi cosnan extraordinario, dicidi di usa boso curiosidad, talento, energia y creatividad, pa descubri con pa innova e industria di 40 aña di edad pa asina e industria por fortalece pa 40 aña mas”, e la conclui y a agrega: “Mi ta sigur cu boso lo accepta e reto, e industria ta wardando boso, cla pa wordo innova y pa mantene su relevancia pa otro 40 glorioso aña mas”.